Ocjo al Fonc
Biadelore e je rivade la tant bramade Primevere, il Soreli al scomence a viodisi simpri plui spes alt tal cîl, lis zornadis si slungjin, o scomencìn a tornâ a sintî i suns de nature che in Invier si jerin impisulîts, i prâts des nestris dolcis culinis a àn za tacât a sverdeâ, ve che a vegnin fûr lis primis gjemis, lis primis rosis e a vegnin fûr ancje i prins foncs di Primevere!
Ancje se il periodi miôr par lâ a foncs al è chel che al va indevant de Istât fin al Autun, ancje in Primevere si puedin cjatâ bogns foncs comestibii, ancje se pôc cognossûts, par esempli lis sponzuelis e i marçulins. Chest al è ancje il moment just par tacâ a preparâsi a chel che dopo al sarà in fat tra Istât e Autun l’exploit dai foncs cu la vignude di purcins, galets, pivis, russulis, chiodins dome par nomenâ cualchidun.
Te imagjin: Esemplâr di Boletus Edulis "Purcin". (comestibilitât libare).
torne sù
A esistin però tancj foncs che a contegnin sostancis tossichis che a puedin determinâ variis sindromis di lizeris a gravis, o fintremai mortâls. Al è duncje une vore impuartant no cjapâ sù dutis lis speciis in maniere indiscriminade, ma cjapâ sù dome ce che si cognòs ben. No consumâ mai un fonc dopo di vêlu comparât cu lis fotos cjapadis di internet/libris o parcè che a àn dade garanzie personis che si cualifichin come espertis presumudis. In câs di cualsisei inciertece su la comestibilitât dai foncs cjapâts sù, prime dal consum o podês indreçâsi a gratis al Ispetorât micologjic des Aziendis Sanitariis. Par un adeguât ricognossiment i esemplârs a àn di jessi complets di ducj i elements utii che a consintin la determinazion de specie: gjambe interie e in câs complete di volve (une specie di sacut che cualchi volte si pues cjatâ a la base de gjambe), se al è presint l’anel, e cjapiel cence netâlu di eventuâls ruspidecis o ornaments presints.
Te imagjin: particolâr de "cortine", element decoratîf fondamentâl pe determinazion dal gjenar che si pues cjatâ su la gjambe. Cortinarius praestans. (comestibilitât libare).
L’Ispetorât micologjic des Aziendis Sanitariis, che si cjate tal Dipartiment di Prevenzion dentri dal Servizi Igjiene dai Aliments e de Nutrizion (tel. 0432 989500 – 0432 989526), al è costituît di micolics esperts che a àn superât un cors di formazion a pueste e che tra lis ativitâts fatis, si ocupin di dâ assistence gratuite ai privâts citadins racueidôrs in merit ae comestibilitât dai foncs cjapâts sù.
Daûr de leç regjonâl 25/2017 pe racuelte dai foncs tal teritori regjonâl si à di jessi in possès de specifiche autorizazion che e previôt la frecuence a un cors minim di 12 oris organizât dai Grups Micologjics federâts locâi, il superament di une prove orâl li de Aziende Sanitarie competente pal propri teritori, e il paiament di une tasse cul impuart variabil in base ae zone là che si sielzarà di lâ a cjapâ sù i foncs.
Te imagjin: particolâr de volve "circelade" in Amanita muscaria (tossic).
torne sùRegulis pe racuelte
I foncs a van cjapâts sù fasint atenzion a no ruvinâ il teren sot cun curtìs o rimpins, parcè che si larès a disfâ il miceli, o sei il cuarp filamentôs che al da vite al fonc. Chest aparât, adun cu lis sporis al è une vore impuartant pe riproduzion dai foncs.
Se i foncs che o cjapìn su a son cognossûts, si pues procedi cuntune somarie pulizie intal lûc, in maniere di lassâ tal bosc lis sporis che si son depositadis su la gjambe. Se invezit si riten necessarie la consulence dal micolic si racomande di cjapâju sù lassant intate la base de gjambe. Si sconsee la racuelte di foncs za madurîts, o sei cuntun cjapiel une vore viert, parcè che tantis speciis comestibilis a chest stadi a deventin in ogni câs tossichis o indigjeribilis, e al è duncje preferibil lassâju tal bosc par permeti la dispersion des sporis. Al è impuartant traspuartâ i foncs in contignidôrs rigjits e aerâts che a evitin procès di fermentazion che a puartaressin ae formazion di sostancis tossichis, duncje a son vietadis par leç borsis di plastiche, russacs e v.i.
Te imagjin: Oudemansiella mucida (no comestibil).
torne sùIndicazions pal consum
Une volte racuelts, i foncs a varessin di jessi preparâts o almancul sboentâts intal timp plui curt pussibil, si sconsee di tignîju intal frigo o piês fûr dal frigo par oris o zornadis parcè che a subissin procès di fermentazion e decomposizion, cul riscli di deventâ subit indigjescj o tossics!
Par ce che al rivuarde la comestibilitât si distinguin in:
foncs a comestibilitât libare che a àn timps di cuete normâi, in gjenar fin a cuant che no si è consumade la aghe di vegjetazion, e a puedin jessi duncje preparâts te maniere che plui si preferìs: trifolâts, frits, ae gridele…
foncs a comestibilitât condizionade de cuete che a àn bisugne di cuetis lungjis no mancul di 40 minuts cul fin di disativâ lis tossinis termolabilis che a àn dentri, duncje a son sconseadis lis cuetis ae gridele, piastre, o il frit. Par cualchi specie, come par esempli chês che a apartegnin al gjenar Armillaria (chiodins), si consee di fâlis bulî prime, cun sucessive eliminazion de aghe doprade, prime de cuete efetive.
I foncs, infûr di rârs câs e determinadis cundizions, no van mai mangjâts crûts, a van consumâts in pocje cuantitât e dome ogni tant. Si sconsee il consum di foncs a fruts, personis anzianis, feminis in gravidance, personis cun dificoltâts digjestivis o intolerancis alimentârs, e personis cun patologjiis al fiât, intestin, rognons o a cui che al scuen fâ ûs costant di farmacs.
Te imagjin: Armillaria mellea (comestibilitât condizionade a prebulidure).
torne sù
La conservazion dai foncs
Par ce che al rivuarde la conservazion dai foncs, cu la pussibilitât di consumâju intun secont moment, si puedin secjâ, conzelâ o meti sot vueli.
Pe essicazion al è ben doprâ suiadôrs eletrics a pueste, che a permetin di otignî un risultâ otimâl; dome cualchi fonc però si preste a jessi secjât, altris invezit, stant che a son pôc revivissients in aghe, a son pôc adats a cheste tecniche di conservazion.
Il conzelament dai foncs al va fat dome dopo de cuete o sboentadure, il prodot al sarà sigûr e al durarà plui a lunc, e in plui al varà une miôr rese organoletiche tal plat.
Par ce che al rivuarde la preparazion dai foncs sot vueli al è di fâ une vore di atenzion, parcè che se no fate in maniere corete e pues puartâ ae formazion di mufis o al svilup dal Clostridium Botulinum. Chi a son lis liniis vuide utilis su la preparazion di conservis in sigurece.
Visant che par cualsisei dubi o podês indreçâsi al Ispetorât Micologjic de Aziende pe Assistence Sanitarie, o augurìn a ducj plasevulis escursions e une buine racuelte!
Te imagjin: Hygrocybe conica var. conicoides (tossic).
torne sùAprofondiment par cure dai Micolics de AAS 3 “Friûl de Alte – Culinâr – di Mieç”.
torne sù
stampa